Душанбе, 19-уми октябри соли 2026
Рӯзи 19-уми октябри соли 2026 дар Донишгоҳи байналмилалии сайёҳӣ ва соҳибкории Тоҷикистон маросими расмии ифтитоҳи даври ниҳоии озмуни ҷумҳуриявии «Илм — фурӯғи маърифат» баргузор гардид.
Озмуни ҷумҳуриявии «Илм – фурӯғи маърифат» бо ташаббуси Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳандозӣ гардида, ба рушди тафаккури илмӣ, тақвияти завқи омӯзиши илмҳои дақиқу табиӣ, риёзӣ ва техникӣ, дарёфту дастгирии истеъдодҳои ҷавон, рушди қобилияти таҳқиқотию ихтироъкорӣ ва омода намудани кадрҳои баландихтисоси илмӣ, муҳандисиву техникӣ равона шудааст.

Даври сеюми озмуни мазкур аз 14-ум то 17-уми сентябри соли 2026 дар Вилояти Мухтори Кӯҳистони Бадахшон, вилоятҳои Суғду Хатлон, шаҳри Душанбе ва шаҳри Ҳисор гузаронида шуд, ки дар он ҳамагӣ 4482 довталаб иштирок намуда, аз рӯйи натиҷаҳо 700 нафар ғолиб гардиданд ва ба даври ниҳоии озмун роҳхат гирифтанд.
Дар дарвараи ниҳоии озмун 700 нафар довталабоне, ки тибқи натиҷаҳои давраи сеюм сазовори ҷойҳои якум, дуюм ва сеюм гардиданд, иштирок хоҳанд кард, ки аз ин шумора 244 нафарашон хонандагони муассисаҳои таҳсилоти миёнаи умумӣ, 223 нафар хонандагони муассисаҳои таълимии навъи нав, 184 нафар донишҷӯ ва 49 нафар намояндагони касбу кори гуногун мебошанд.
Бояд гуфт, ки даври ниҳоии озмуни ҷумҳуриявии «Илм – фурӯғи маърифат» аз 19-ум то 28-уми октябри соли 2026 идома хоҳад кард.
Озмуни ҷумҳуриявии «Илм – фурӯғи маърифат» аз ду қисм иборат буда, қисми аввали он тавассути Маркази миллии тестии назди Президенти Ҷумҳурии Тоҷикистон ва қисми дуюм бо иштироки ҳайати ҳакамон баргузор мегардад.

Бо мақсади таъмини шаффофият ва адолат дар арзёбӣ, соли равон холгузорӣ дар озмун пурра ба таври рақамӣ ба роҳ монда шудааст. Натиҷаи холҳои бадастовардаи ҳар як иштирокдор фавран пас аз анҷоми иштирок дар қисми дахлдори озмун тавассути экран нишон дода мешавад. Ин тартиб имкон медиҳад, ки раванди арзёбӣ шаффоф ва натиҷаҳо барои иштирокдорон дастрас бошанд.
Тавассути низоми электронӣ холҳои довталабон сабт ва ҷамъбаст гардида, натиҷаҳои арзёбӣ тибқи меъёрҳои муқарраргардида муайян карда мешаванд. Ин раванд ба коҳиш додани таъсири омилҳои инсонӣ ва пешгирии тағйироти беасос дар натиҷаҳои арзёбӣ мусоидат менамояд.

Озмуни мазкур имконияти арзишманд барои муаррифии дониш, истеъдод ва қобилияти илмии иштирокдорон буда, ба ташаккули насли донишманду эҷодкор ва рушди неруи зеҳнии кишвар мусоидат менамояд.





