Душанбе, 26-уми декабри соли 2022
26-уми декабри соли 2022 кормандони Маркази миллии тестии назди Президенти Ҷумҳурии Тоҷикистон дар пайравӣ аз ташаббусу иқдомҳои инсондӯстонаю хайрхоҳонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар арафаи иди Соли нави мелодӣ бо таълимгирандагони интернати назди муассисаи таҳсилоти миёнаи умумии № 55-и ноҳияи Варзоб вохӯрда, ба онҳо туҳфаҳо доданд.
Дар ин вохӯрӣ кормандони Маркази миллии тестии назди Президенти Ҷумҳурии Тоҷикистонро муовини раиси ноҳияи Варзоб Қосимзода Моҳтоб ҳамроҳӣ кард. Муовини якуми директори Марказ Шодиниё Абдулбосит бо таълимгирандагони интернати мазкур суҳбат карда, дар бораи таваҷҷуҳу дастгириҳои пайваста ва махсуси Президент ва Ҳукумати Ҷумҳурии Тоҷикистон нисбат ба ятимону бепарасторон қайд намуд. Номбурда иброз дошт, ки дар партави сиёсати инсондӯстонаи Президенти Ҷумҳурии Тоҷикистон, Пешвои миллат дар саросари ҷумҳурӣ нисбат ба ин гурӯҳи кӯдакон ғамхорию меҳрубонӣ зоҳир карда мешавад, то ин ки онҳо ҳаргиз худро яккаву танҳо ҳис накунанд.
Дар охир Шодиниё Абдулбосит таълимгирандагони муассисаи мазкурро ба муносибати иди дарпешистода – Соли нави мелодӣ табрик карда, ба онҳо туҳфаҳои идонаи Марказро тақдим кард.
Дар навбати худ таълимгирандагони ин муассиса ба Пешвои муаззами миллат муҳтарам Эмомалӣ Раҳмон барои ғамхорӣ ва дастгириҳои пайваста изҳори сипосу миннатдорӣ карданд.
