Душанбе, 13-уми майи соли 2026
13-уми майи соли 2026 дар Донишгоҳи аграрии Тоҷикистон ба номи Шириншоҳ Шоҳтемур марҳилаи якуми озмуни довталабон барои дарёфти бурсияҳои таҳсил дар Ҷумҳурии Қазоқистон, Ҷумҳурии Беларус ва Донишкадаи давлатии муносибатҳои байналмилалии Москва (Московский государственный институт международных отношений) барои соли таҳсили 2026-2027 дар зинаҳои бакалавриат баргузо гардид.
Дар ифтитоҳи он муовини якуми директори Маркази миллии тестии назди Президенти Ҷумҳурии Тоҷикистон Шодиниё Абдулбосит Шодӣ, муовини директори Маркази миллии тестии назди Президенти Ҷумҳурии Тоҷикистон Олимҷонзода Уктам Олимҷон, муовини директори муассисаи давлатии “Маркази барномаҳои байналмилалӣ” Тоҷиддин Баҳриддин, кормандони Маркази миллии тестӣ ва муассисаи давлатии “Маркази барномаҳои байналмилалӣ” ширкат намуданд.
Дар оғоз муовини аввали директори Маркази миллии тестии назди Президенти Ҷумҳурии Тоҷикистон Шодиниё Абдулбосит Шодӣ таъкид намуд, ки омода намудани мутахассисони баландтахассус дар кишварҳои пешрафта зери таваҷҷуҳи махсуси Президенти кишвар ва Ҳукумати Ҷумҳурии Тоҷикистон қарор дорад ва барои интихоби довталабони арзанда ҷиҳати таҳсил дар муассисаҳои таълимии хориҷи кишвар шароити мусоид фароҳам карда шудааст.
Дар идома Шодиниё А. Ш. нуктаҳои муҳимро барои супоридани имтиҳонҳои марҳилаи якуми озмуни довталабон барои дарёфти бурсияҳои таҳсил дар Ҷумҳурии Қазоқистон, Ҷумҳурии Беларус ва Донишкадаи давлатии муносибатҳои байналмилалии Москва (Московский государственный институт международных отношений) барои соли таҳсили 2026-2027 ба довталабон таъкид намуда, дар бораи талабот ва тартиби озмун маълумот дод ва ба онҳо барои супоридани имтиҳонҳо барору мувафаққият таманно кард.
Лозим ба зикр аст, ки тибқи тартиби муқарраркардаи Ҳукумати Ҷумҳурии Тоҷикистон марҳилаи аввали озмунро барои дарёфти бурсияҳои давлатҳои хориҷӣ барои зинаи бакалавр Маркази миллии тестии назди Президенти Ҷумҳурии Тоҷикистон дар шакли тест баргузор мекунад.
Марҳилаи дуюми озмунро Комиссияи ҷумҳуриявӣ оид ба интихоб ва тайёр намудани мутахассисон дар давлатҳои хориҷӣ баргузор менамояд. Ғолибони озмун аз рӯйи ихтисосҳои интихобкардаашон дар донишгоҳҳои кишварҳои мутараққии ҷаҳон таҳсил хоҳанд кард.
Бояд қайд кард, ки дар марҳилаи якум барои иштирок дар озмун барои дарёфти ин бурсияҳои таҳсил беш аз 240 нафар довталаб иштирок намуданд.
