Душанбе, 21-уми январи соли 2026
21-уми январи соли 2026 дар дафтари асосии Маркази миллии тестии назди Президенти Ҷумҳурии Тоҷикистон ҷаласаи ҷамъбастӣ-ҳисоботии ташкилоти ибтидоии Ҳизби Халқии Демократии Тоҷикистон дар ноҳияи Исмоили Сомонӣ “Роҳнамои довталаб” баргузор шуд.
Дар ҷаласа директори Марказ Ҷаъфарзода Сабзалӣ Файзалӣ, муовини раиси Кумитаи иҷроияи Ҳизби Халқии Демократии Тоҷикистон дар ноҳияи Исмоили Сомонӣ Раҳматуллозода Мавзуна, мудири шуъбаи кор бо занони ин Кумита Сафарзода Шаҳноза ва кормандони Марказ иштирок намуданд.
Ҷаласа бо садо додани Суруди миллӣ ва суханони ифтитоҳии директори Марказ Ҷаъфарзода Сабзалӣ Файзалӣ оғоз шуд.
Раиси ташкилоти ибтидоии Ҳизби Халқии Демократии Тоҷикистон дар ноҳияи Исмоили Сомонӣ “Роҳнамои довталаб”, ҳамзамон директори Маркази миллии тестии назди Президенти Ҷумҳурии Тоҷикистон Ҷаъфарзода Сабзалӣ Файзалӣ ба кори маҷлис оғоз бахшида, пас аз сухани ифтитоҳӣ оид ба фаъолияти ташкилоти ибтидоии ҳизбии “Роҳнамои довталаб” дар давоми соли 2025 маърузаи ҳисоботӣ кард.
Ҷаъфарзода С. Ф. қайд кард, ки ташкилоти ибтидоии ҳизбии “Роҳнамои довталаб” фаъолияти худро дар соли сипаришуда дар асоси Оиннома, Барнома, нақшаи чорабиниҳои Кумитаи иҷроияи марказии Ҳизби Халқии Демократии Тоҷикистон ва ташкилоти ибтидоии ҳизбӣ ва дастуру супоришҳои Асосгузори сулҳу ваҳдати миллӣ, Пешвои миллат, Раиси Ҳизби Халқии Демократии Тоҷикистон муҳтарам Эмомалӣ Раҳмон ба роҳ монда, вазифаҳояшро, бахусус дар робита ба ташвиқу тарғиби ғояҳои оинномавии ҳизб ва ҳадафҳои идеологии он муваффақона ба анҷом расонидааст. Теъдоди аъзои ташкилоти ибтидоии ҳизбӣ аз як давраи ҳисоботӣ то давраи дигар меафзояд.
Минбаъд низ ташкилоти ибтидоии ҳизбии «Роҳнамои довталаб» дастуру супоришҳои Раиси Ҳизби Халқии Демократии Тоҷикистон муҳтарам Эмомалӣ Раҳмонро роҳнамои кори хеш қарор дода, дар иҷрои вазифаҳояш саъю талош хоҳад кард, – қайд кард Ҷаъфарзода С. Ф.
Дар идома вобаста ба омӯзиши Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон «Дар бораи самтҳои асосии сиёсати дохилӣ ва хориҷии ҷумҳурӣ» ба Маҷлиси Олии Ҷумҳурии Тоҷикистон, ки санаи 16-уми декабри соли равон ироа гардида буд аз ҷониби кормандони Марказ маърузаҳо пешниҳод карда шуд.
Сипас муовини раиси Кумитаи иҷроияи Ҳизби Халқии Демократии Тоҷикистон дар ноҳияи Исмоили Сомонӣ Раҳматуллозода Мавзуна аз аъзои ташкилоти ибтидоии Ҳизби Халқии Демократии Тоҷикистон дар ноҳияи Исмоили Сомонӣ “Роҳнамои довталаб” ва раиси он Ҷаъфарзода С. Ф. барои фаъолияти пурсамарашон изҳори ташаккур карда, онро қаноатбахш ва гузашта аз ин, шоистаи таҳсин ва намунаи ибрати ташкилотҳои ҳизбии дигар шуморида, ҳамагонро барои ҷаҳду талошҳои бештар баҳри иҷрои ғояву аҳдофи Ҳизби Халқии Демократии Тоҷикистон даъват кард.
Дар анҷом ду нафар аз ҷумлаи кормандони ҳайати асосии Марказ ба узвияти Ҳизби Халқии Демократии Тоҷикистон пазируфта шуданд.
