Душанбе, 28-уми январи соли 2022
27-уми январи соли 2022 дар 68 шаҳру ноҳияи ҷумҳурӣ даври дуюми курси шиносоӣ бо низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон барои соли ҷорӣ оғоз ëфт.
Дар ин марҳила тӯли ду рӯз 3872 нафар намояндаи муассисаҳои таълимии таҳсилоти умумии асосӣ, миёнаи умумӣ ва ибтидоию миёнаи касбӣ дар 70 нуқтаи баргузории курсҳои шиносоӣ ширкат мекунанд.
Маркази миллии тестии назди Президенти Ҷумҳурии Тоҷикистон дар ҳамкорӣ бо Вазорати маориф ва илми Ҷумҳурии Тоҷикистон бо мақсади омӯзонидани таблиғгарони низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии ҷумҳурӣ дар соли 2022 ва омодасозии онҳо барои сари вақт огоҳ намудани ҷомеа, бахусус омӯзгорону хатмкунандагони муассисаҳои таълимии таҳсилоти миёнаи умумӣ ва ибтидоию миёнаи касбӣ бо тартиби ИМД курси шиносоиро дар се сатҳ (давр): ҷумҳуриявӣ, шаҳрию ноҳиявӣ ва муассисаҳои таълимӣ ташкилу баргузор менамояд.
Бояд қайд кард, ки тибқи Нақшаи чорабиниҳои Марказ оид ба ташкил ва гузаронидани ИМД-2022 аз 1-уми феврал то 12-уми март, дар баробари мониторинги рафти курси шиносоӣ дар сатҳи сеюм, вохӯриҳои кормандони доимӣ ва муваққатии Марказ бо хатмкунандагони муассисаҳои таълимии шаҳру ноҳияҳо, омӯзгорон ва падару модарон пешбинӣ шудааст.
