Душанбе, 15-уми майи соли 2024
Аз 14-ум то 15-уми майи соли 2024 дар Китобхонаи миллии Тоҷикистон бо ташаббуси Вазорати молияи Ҷумҳурии Тоҷикистон дар якҷоягӣ бо Бонки ҷаҳонӣ, вазоратҳои маориф ва илм; тандурустӣ ва ҳифзи иҷтимоии аҳолӣ; меҳнат, муҳоҷират ва шуғли аҳолӣ, инчунин шарикони рушд Форуми байналмилалии рушди сармояи инсонӣ дар соли 2024 доир гардид.
Дар ин форуми сатҳи байналмилалӣ, ки ду рӯз идома ёфт, намояндагони вазорату идораҳо аз Ҷумҳурии Тоҷикистон, кишварҳои Осиёи Марказӣ, шарикони рушд, ташкилотҳои ҷомеаи шаҳрвандӣ ва ҷавононон, дар маҷмуъ, зиёда аз 350 нафар иштирок карданд.
Ҷаъфарзода Сабзалӣ, директори Маркази миллии тестии назди Президенти Ҷумҳурии Тоҷикистон, дар ҷаласае (сессияе), ки ба мавзуи “Сифати таҳсилот: мусоидат барои афзоиши сармояи инсонӣ” ихтисос дода шуда буд, маъруза кард. Ӯ дар боби иштироки Ҷумҳурии Тоҷикистон дар Барномаи байналмилалии арзёбии хонандагон (PISA) 2025 ва интизориҳо аз натиҷаҳои иштирок дар ин барнома ва таъсири он ба сиёсату стратегия дар маориф ва самти амалии он дар кишвар ибрози назар кард. Дар идомаи суханронияш, аз ҷумла гуфт: “Мо интизорем, ки натиҷаҳои PISA дар Ҷумҳурии Тоҷикистон сифат ва воқеияти натиҷаҳои таҳсилотро дар Ҷумҳурии Тоҷикистон нишон дода, имкон медиҳад, ки омӯзгорон ва дигар алоқамандони соҳа аз таҷрибаи кишварҳои дигар баҳравар шаванд. Натиҷаҳо барои муайян намудани афзалиятҳои сиёсат ва таҳияи дурусти ислоҳоти маориф, аз ҷумла таҳияи усулҳои самараноки таълим, таҳияи сиёсату равишҳои бештар муассир дар арзёбии дастовардҳои таълимии хонандагон мутобиқи меъёрҳои байналмилалӣ ва беҳтар намудани муҳити мавҷудаи таълим барои қонеъ гардонидани талаботи хонандагон истифода мешаванд.”
Мақсад аз баргузории форум таҳияи консепсияи ҳамаҷонибаи фарогири афзоиши сармояи инсонӣ дар рушди маориф ва соҳаҳои дигар аст.
Форуми мазкур бо мубоҳисаи иштирокдорон дар бораи сифати таҳсилот, рушди сармояи инсонӣ дар шароити феълии Тоҷикистон ва масъалаҳои дигари дахлдор ба анҷом расид.
