Муҳтарам кормандони соҳаи маориф ва илм!
Бо камоли эҳтиром ва самимияти хос Шумо ва дар симои Шумо тамоми мардуми шарифи Тоҷикистонро ба муносибати Рӯзи Президенти Ҷумҳурии Тоҷикистон самимона табрик менамоям.
Рӯзи Президенти Ҷумҳурии Тоҷикистон яке аз санаҳои муҳими таърихи давлатдории навини тоҷикон буда, рамзи арҷгузорӣ ба хидматҳои шоистаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар роҳи таҳкими истиқлоли давлатӣ, ҳифзи сулҳу субот, таъмини ваҳдати миллӣ ва пешрафту ободии Ватани азизамон мебошад.
Дар воқеъ, шахсияти Пешвои миллат ва фаъолияти созандаи эшон бо марҳилаҳои муҳимтарини ташаккул ва рушди Тоҷикистони соҳибистиқлол пайванди ногусастанӣ дорад. Бо роҳбарии хирадмандона, сиёсати дурбинона ва талошҳои пайгиронаи муҳтарам Эмомалӣ Раҳмон Тоҷикистон тавонист мушкилоти мураккаби солҳои аввали истиқлолро паси сар намуда, ба марҳилаи нави давлатсозӣ, бунёдкорӣ ва рушди устувор ворид гардад. Имрӯз дастовардҳои назарраси кишвар дар арсаҳои гуногуни ҳаёти сиёсӣ, иқтисодӣ, иҷтимоӣ ва фарҳангӣ маҳз натиҷаи сиёсати созанда ва ташаббусҳои стратегии Роҳбари давлат мебошанд.
Яке аз самтҳои калидии сиёсати иҷтимоии Пешвои миллат соҳаи маориф аст зеро маориф ҳамчун омили асосии рушди ҷомеа, ташаккули тафаккури миллӣ ва тарбияи насли соҳибмаърифат дар меҳвари сиёсати давлат аст. Ҳамеша таъкид гардидани аҳаммияти илму дониш, бунёди муассисаҳои таълимӣ, фароҳам овардани шароити мусоид барои таҳсил ва такмили низоми маориф гувоҳи равшани ин сиёсати маорифпарварона мебошад.
Дар ин замина таъсис ва фаъолияти Маркази миллии тестии назди Президенти Ҷумҳурии Тоҷикистон яке аз дастовардҳои муҳими соҳаи маориф ва натиҷаи сиёсати хирадмандонаю ояндабинонаи Пешвои миллат ба шумор меравад.
Таъсиси ин Марказ бо ибтикор ва дастгирии бевоситаи Президенти Ҷумҳурии Тоҷикистон муҳтарам Эмомалӣ Раҳмон дар низоми таҳсилоти кишвар марҳилаи муҳимми ислоҳотро оғоз бахшид. Ҳадафи асосии ин иқдом ҷорӣ намудани низоми муосир, шаффоф ва одилонаи қабули довталабон ба муассисаҳои таҳсилоти миёна ва олии касбӣ, таъмини имкониятҳои баробар ва фароҳам овардани шароити мусоид барои интихоби ҷавонони донишманду лаёқатманд ва аз байн бурдани фасод ва дигар амалҳои номатлуб дар қабули донишҷӯён ба муассисаҳои таълимии таҳсилоти миёна ва олии касбӣ буд.
Маркази миллии тестӣ дар тӯли фаъолияти худ тавонист дар татбиқи ин ҳадафҳои муҳим саҳми назаррас гузошта, ҳамчун ниҳоди масъули таъмини шаффофият, адолат ва баробарҳуқуқии шаҳрвандон дар дастрасӣ ба таҳсилоти касбӣ мавқеи устувор пайдо намояд. Имрӯз низоми имтиҳонҳои марказонидашудаи дохилшавӣ ба яке аз механизмҳои муҳими такмили низоми маориф табдил ёфта, барои ҳазорон ҷавони кишвар имконияти воқеии амалӣ намудани орзуву ҳадафҳои таълимӣ ва касбии онҳоро фароҳам меорад.
Муҳимтар аз ҳама, Марказ ҳамчун яке аз ниҳодҳои хоси мамлакат мавриди таваҷҷуҳи махсуси Пешвои миллат вобаста ба масъалаи рушди неруи зеҳнӣ ва сармояи инсонии кишвар мебошад. Зеро фароҳам овардани шароити баробар барои таҳсил, дастгирии ҷавонони лаёқатманд ва ҷалби онҳо ба зинаҳои минбаъдаи таҳсилот яке аз заминаҳои асосии тарбияи мутахассисони соҳибкасб ва таъмини рушди устувори давлат маҳсуб меёбад.
Мо ифтихор дорем, ки Маркази миллии тестӣ маҳз дар заминаи чунин сиёсати созанда таъсис ёфта, имрӯз ҳамчун яке аз ниҳодҳои муҳими низоми маорифи кишвар дар татбиқи ҳадафҳои давлатӣ саҳми худро мегузорад. Ин ифтихор ҳамзамон масъулияти моро барои фаъолияти босамар, риояи қатъии принсипҳои адолату шаффофият, истифодаи технологияҳои муосир ва пайваста баланд бардоштани сифати хизматрасонӣ дучанд менамояд.
Боварии комил дорем, ки дар партави сиёсати маорифпарваронаи Пешвои миллат, бо истифода аз имкониятҳои фароҳамоварда ва саъю талоши аҳли маорифу ҷомеа низоми таҳсилоти кишвар бештар рушд намуда, барои ташаккули насли донишманд, соҳибмаърифат, ватандӯст ва рақобатпазир заминаҳои мусоид фароҳам хоҳад овард.
Дар ин рӯзи фархунда ба тамоми мардуми шарифи Тоҷикистон сулҳу суботи пойдор, ваҳдати миллӣ, зиндагии шоиста ва барору комёбӣ таманно дорам.
Бигзор, таҳти роҳбарии хирадмандонаи Пешвои миллат Тоҷикистони соҳибистиқлол ҳамеша сарбаланду обод ва мардуми он саодатманду сарфароз бошанд!
Рӯзи Президенти Ҷумҳурии Тоҷикистон муборак!





